gargonpa

༄༅། །སྐྱབས་རྗེ་མགར་ཆེན་རིན་པོ་ཆེའི་སྐུ་རབ་རིམ་བྱོན་གྱི་བྱུང་བ་མདོར་ཙམ་བརྗོད་པ། སྔོན་པ་བསྐལ་པ་བྱེ་བ་མང་པོའི་སྔ་རོལ་དུ་འཇིག་རྟེན་གྱི་ཁམས་འདིར་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་སྟོབས་དང་ལྡན་པ་ཞིག་བྱུང་བ་དེའི་རང་གི་ཁྱབ་ཁོང་སྐྱེ་དགུ་རྣམས་དགེ་བ་བཅུའི་ལམ་ལ་འགོད་པར་མཛད། དེ་ལ་སྲས་བྱད་བཞིན་བཟང་བ་སྟོང་བྱུང་། མཐར་རྒྱལ་པོ་ཉིད་རབ་དུ་བྱུང་ནས་སངས་རྒྱས་པ་ལ་དེ་བཞིན་གཤེགས་པ་ཀླུ་རིགས་སྒྲོན་མེ་ཞེས་བྱ་བར་གྱུར། སངས་རྒྱས་དེའི་ཆོས་འཁོར་རྒྱ་ཆེར་བསྐོར་ཏེ་གཟུགས་ཅན་གཟུགས་མེད་ཀྱི་སེམས་ཅན་གྲངས་མེད་པ་སྨིན་ཅིང་གྲོལ་བར་མཛད། དེའི་ཚེ་རྒྱལ་སྲས་ཐ་ཆུང་འདོད་པ་སྐྱེས་མ་གཏོགས་སྲས་གཞན་རྣམས་ཚང་མ་རབ་ཏུ་བྱུང་སྟེ་བྱང་ཆུབ་མཆོག་ཏུ་སེམས་བསྐྱེད་པས་མ་འོངས་བའི་དུས་སུ་འདི་དང་འདི་ལྟ་བུར་སངས་རྒྱས་པར་འགྱུར་རོ་ཞེས་རིགས་དང་མཚན་དང་གདུལ་བྱ་ཞིང་ཁམས་དང་བཅས་པ་སོ་སོར་ལུང་བསྟན་ཐོབ། དེ་ནས་དེ་བཞིན་གཤེགས་པ་དེའི་སྲས་ཐ་ཆུང་བང་ཆུབ་ལམ་ལ་བསྐུལ་བར་དགོང་ཏེ་སྤྲུལ་པའི་དགེ་སློང་གཉིས་བཏང་བས་དགེ་སློང་དེ་གཉིས་རྒྱལ་བུ་འདོད་ཡོན་ལ་གཡེང་བཞིན་པའི་སར་ཕེབས་ནས་འཁོར་བར་ངེས་འབྱུང་སྐྱེ་བའི་ཆོས་ཀྱི་ཚིག་བཅད་དབྱངས་སྙན་པོས་གསུང་པས་སངས་རྒྱས་ཀྱི་ཐུགས་རྗེའི་མཐུས་ཕོ་བྲང་ནང་གི་ཡོ་བྱད་ཐམས་ཅད་དང་ཕྱི་རོལ་ཀྱི་ལྗོན་ཤིང་སོགས་ལས་ཀྱང་སྒྲ་དེ་རང་གྲགས་པར་གྱུར་ཏོ། །དེ་ནས་རྒྱལ་བུ་ཐ་ཆུང་ཡང་བློ་འགྱུར་ནས་འཁོར་བར་ངེས་འབྱུང་སྐྱེས་ཏེ་ཡབ་སངས་རྒྱས་ཉིད་དང་ཕུ་བོ་གཞན་རྣམས་ལ་གསེར་གདུགས་རིན་ཆེན་རྒྱན་ཅན་རེ་མཆོད་པར་ཕུལ་ནས་རབ་ཏུ་བྱུང་ཏེ་བྱང་ཆུབ་མཆོག་ཏུ་སེམས་བསྐྱེད། དེ་ནས་དེ་བཞིན་གཤེགས་པ་ཀླུ་རིགས་སྒྲོན་མེས་མ་འོངས་པར་སྲས་སྟོང་རྣམས་བསྐལ་བཟང་སངས་རྒྱས་སྟོང་རུ་སངས་རྒྱས་པའི་དུས་སྲས་ཐ་ཆུང་ཉིད་སངས་རྒྱས་སྟོང་གི་ཐ་མ་སངས་རྒྱས་མོས་པ་མཐའ་ཡས་ཞེས་པར་སངས་རྒྱས་ཏེ་མཛད་པ་འཕྲིན་ལས་སངས་རྒྱས་གོང་མ་རྣམས་ལས་ཁྱད་འཕགས་ཡོང་བར་ལུང་བསྟན་ནོ། [...]

མགར་ཆེན་སྐུ་ཕྲེང་གསུམ་པ་དྷརྨ་སུརྱའི་ཐུགས་སྲས་བླ་མཁྱེན་རྣམས་གཉིས་ཞེས་མགར་མི་འགྱུར་དང་རྣམ་རོལ་གཉིས་ལས་མགར་མི་འགྱུར་སྐུ་ཕྲེང་ལྔ་ཙམ་བྱུང་བ་ངག་རྒྱུན་དུ་བཤད་ཚུལ་ཡོད་ཀྱང་དོན་ལ་སྡོམ་པ་མི་འགྱུར་དང་གཉུ་བ་མི་འགྱུར། སྐོ་ནེ་མི་འགྱུར་གསུམ་ལས་མི་གསལ། ད་ལྟ་བཞུགས་པ་ནི་འགར་ར་མི་འགྱུར་ཞུ་ཞིང་ཁོང་ནི་ནང་ཆེན་མདོ་ཁམས་སྲིབ་མདའི་ཡབ་འགར་བ་ཀར་དགེ་དང་ཡུམ་བཀྲ་ཤིས་ཚེ་མཚོ་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ལྕགས་འབྲུག་ལོར་སྐུ་འཁྲུངས། ཆུང་དུས་ནས་དམ་པའི་རང་གཤིས་ལྡན་ཞིང་ཞི་དུལ་བག་ཡོད་ཀྱི་བསླབ་གསུམ་ངུར་སྨྲིག་འཛིན་པའི་ཁྱུ་མཆོག་སྙིགས་དུས་བསྟན་པའི་སྒྲོན་མེ་གཅིག་ཏུ་གྱུར་པ་ནི་རྣམ་ཐར་གྱི་ཆེ་བ་ཉིད་དུ་ཤེས་སོ།

མགར་ཆེན་སྐུ་ཕྲེང་གསུམ་པ་དྷརྨ་སུརྱའི་ཐུགས་སྲས་བླ་མཁྱེན་རྣམས་གཉིས་ཞེས་པ་ལས་མགར་རྣམ་རོལ་སྐུ་ཕྲེང་ལྔ་ཙམ་བྱུང་བའི་ཚོད་དཔག་གྱི་ངག་རྒྱུན་ཡོད་ཀྱང་དོན་དངོས་མཚན་ཙམ་ཤེས་པར་དཀའ་བ་དང་། བཞི་པ་དཀོན་མཆོག་བསྟན་འཛིན་གཞན་ཕན་དབང་པོ་ནི་ཡེ་རྒྱལ་ནམ་མཁའ་མཛོད་ཀྱི་གནས་སྒོ་ལྷུན་གྲུབ་ཨེ་ཝཾ་དགོན་དུ་ཡབ་སྨུག་རུ་དགེ་འདུན་དང་ཡུམ་དཔལ་ཆོས་གཉིས་ཀྱི་སྲས་སུ་སྐུ་འཁྲུངས་ཤིང་མཁས་གྲུབ་གཉིས་ལྡན་གྱི་མཚན་ལྡན་བླ་མ་དམ་པའི་རྣམ་ཐར་འཆང་བའི་རྡོ་རྗེ་སློབ་དཔོན་ཆེན་པོ་བཞུགས་པས། ནང་ཆེན་རྒྱལ་པོ་གདུང་རབས་རེ་དྲུག་པ་དབང་དྲག་ཚེ་རིང་ལྷ་རྒྱལ་གྱིས་གཙུག་ཏུ་བཀུར་བའི་བླ་མ་བཅུ་གསུམ་གྲལ་དུ་མཆོད་ནས་ཆེ་འཐོབ་ཀྱི་བཀུར་བའི་འོས་སུ་གྱུར་པ་ཡིན་ནོ། །ལྔ་པ་དཀོན་མཆོག་ཀུན་བཟང་ཕྲིན་ལས་ནི། གདན་ས་དངོས་ཀྱི་ནང་དུ་ཡབ་གོང་མའི་གཅུང་འཚོ་མཛད་ངག་དབང་སངས་རྒྱས་དང་ཡུམ་བཅོད་བཟའ་གཡང་ཆེན་གཉིས་ཀྱི་སྲས་སུ་འཁྲུངས་ཤིང་བསྟན་དགོན་ལ་སྨིན་པའི་བྱ་བ་བྱེད་བཞིན་པར་བཞུགས་སོ།

།མགར་གྲུབ་ཐོབ་འཆི་མེད་རྡོ་རྗེ་ནི་མགར་དགོན་ཆོས་སྡེའི་ནང་ཚན་གྱང་དགེ་རག་ཤྲི་ཚང་དུ་ཡབ་རག་ཤྲི་ནོར་བུ་བཀྲ་ཤིས་དང་ཡུམ་བརྗིད་བཟའ་སྐྱིད་འཛོམས་གཉིས་ཀྱི་སྲས་སུ་མཐའ་དམར་ནང་དུ་འཁྲུངས་ཤིང་གྲུབ་པའི་རྟགས་མཚན་ལྷན་སྐྱེས་སུ་མངའ་བའི་བྱིས་པ་ངོ་མཚར་ཅན་བྱུང་བ་མགར་འཕྲི་ལས་ཡོངས་ཁྱབ་ཀྱི་རྗེས་སུ་བཟུང་ནས་གདམས་བཅུད་ཐོབ་པ་རྩེ་གཅིག་ཏུ་ཉམས་བཞེས་མཛད་པས་གྲུབ་པའི་གོ་འཕང་འཐོན་པོར་གཤེགས་ནས་སྲ་འཁྲེག་གི་རྡོ་ལ་ཞབས་རྗེས་འདམ་ལ་བཞག་པ་ལྟར་མཛད་པ་ད་ལྟ་དངོས་སུ་མཇལ་དུ་ཡོད་པ་སོགས་བོད་ཡུལ་མཐའ་དབུས་ཀུན་ལ་སྙིང་པོ་ཡི་གེ་དྲུག་མའི་ཆོས་ཀྱི་ཆར་ཆེན་ཕབ་པས་མགར་མ་ཎི་བླ་མ་ཞེས་འབོད་པའི་འགྲོ་དོན་ཕྲིན་ལས་ཀྱི་བདག་པོར་གྱུར་ནས་དགོན་གནས་རི་ཁྲོད་མང་པོ་བཏབ་པའི་ལོ་རྒྱུས་མངའ། མཐར་ས་ཁྱིའི་ཟིང་འཁྲུག་༡༩༥༨ལོར་ཆབ་མདོ་དགོན་པའི་འཚོགས་ཆེན་འདུ་ཁང་ནང་གཟུགས་སྐུའི་བཀོད་པ་བསྡུས། སྐུ་སྐྱེ་གཉིས་པ་སྤྲུལ་ཨ་ཆུང་ནི་ཡབ་འཇམ་དབྱངས་གྲགས་པ་དང་ཡུམ་མགར་ཆེན་བརྒྱད་པའི་ལྕམ་སྲིང་མ་ཀུན་བཟང་ཆོས་སྒྲོན་གཉིས་ཀྱིས་སྲས་སུ་འཕགས་ཡུལ་དུ་བལྟམས། ད་ལྟ་གོང་མའི་མཛད་ཕྲིན་སྐྱོང་ནས་བཞུགས་པ་དང་ད་དུང་སྐུ་གསུང་ཐུགས་ཀྱི་སྤྲུལ་སྐུ་དག་ཀྱང་བཞུགས་བཞིན་པ་ཡིན།

རྒྱལ་སྤྱིའི་མགར་དགོན་འཛིན་སྐྱོངས་ལྷན་ཚོགས་ཞེས་པའི་ཚོགས་པ་འདི་ནི། ཕྱི་རྒྱལ་ཤར་ནུབ་ཡུལ་གྲུ་ཁག་ལ་ཡོད་པའི༧སྐྱབས་རྗེ་མགར་ཆེན་རིན་པོ་ཆེའི་འཕྲིན་ལས་ཀྱི་ཆ་ཤས་༧འབྲི་གུང་བཀའ་བརྒྱུད་མགར་དགོན་པའི་ཆོས་ཚོགས་ཁག་གི་འགན་འཛིན་བླ་མ་རྣམས་པ་ཚང་འཛོམ་གྱི་ཚོགས་པ་ཞིག་ཡིན་ལ། ཚོགས་པ་འདི་ལྟར་ཚུག་དགོས་པའི་དམིགས་ཡུལ་ནི། དེང་དུས་འཛིན་སྐྱོངས་ཀྱིས་འགྲོས་དང་མཐུན་པར་ཐུན་མོང་མཉམ་ལས་དགོས་རྒྱུ་ནི་མེད་ཐབས་མེད་པ་ཡིན་པར་མ་ཟད། ཡུལ་གྲུ་སོ་སོར་གནས་པའི་ཆོས་ཚོགས་རྣམས་ཀྱང་བླ་མ་གཅིག་དང་དགོན་པ་གཅིག་གི་ཁོངས་གཏོགས་ཡིན་པར་རྟེན་འཛིན་སྐྱོངས་སྒྲོམ་གཞི་གཅིག་གི་འོག་ཏུ་མཉམ་གནས་ཀྱིས་ཕན་ཚུན་གཞོགས་འདེགས་ལམ་བསྟོན་སོགས་ལས་དོན་དུ་མར་༧སྐྱབས་རྗེ་མགར་ཆེན་རིན་པོ་ཆེ་དང་མགར་དགོན་པའི་ཚབ་མཚོན་གྱི་ཚོགས་པ་ཞིག་ཡིན།

མགར་དགོན་ལོ་རྒྱུས་མདོར་བསྡུས། མགར་དགོན་ཉང་ཆེན་བྱང་ཆུབ་ཆོས་འཁོར་གླིང་ནི། འཛམ་གླིང་ས་ཡི་གཙུག་རྒྱན་དུ་མཆོད་པའི་བསིལ་ལྡན་གངས་གྱི་རི་བོའི་མུ་ཁྱུད་ཀྱིས་ཡོངས་སུ་བསྐོར་བའི་ཆོལ་གསུམ་བོད་ཀྱི་ནང་ཚན་མདོ་སྟོད་མི་ཡི་ཆོལ་ཁ་མདོ་ཁམས་ས་ཡི་ཐིག་ལེ། ཟླ་ལྕི་བར་མི་རབ་སྒང་། སྒ་འགྲུ་འདྲེས་མའི་གཡས་ཟུར། ནང་ཆེན་འཆིལ་སྐེ་ཐང་གི་གཡོན་ཕྱོགས་ཡེ་རྒྱལ་ནམ་མཁའ་མཛོད་ཀྱི་མདུན་ཐད་དཔལ་གཡང་ཕྱུག་མོ་དལ་གྱིས་འབབ་པའི་སྨད་འགྲམ། ཉང་ཆེན་པདྨའི་ལུང་པ་ཞེས་དེང་སྐབས་ཡུལ་ཤུལ་ཁུལ་ནང་ཆེན་རྫོོང་སྤྲེལ་ཚྭ་ཞང་གི་ལྷོ་ཕྱོགས་ལེ་དབར་བདུན་བཅུའི་སར་དཔལ་ཆུ་སྨད་མའི་ཡུལ་ཚོ་ལུང་པ་པད་མ་དམར་པོ་ཁ་ཕྱེ་འདྲ་རྒྱབ་རི་གླང་ཆེན་འགྱིང་འདྲ། གཡས་རི་སྟག་མོ་འཁྱོང་འདྲ། གཡོན་བྲག་སེང་གེ་ངར་འདྲ། མདུན་རི་རྟགས་བརྒྱད་བཀོད་འདྲ། [...]