མགར་ཆེན་སྐུ་ཕྲེང་གསུམ་པ་དྷརྨ་སུརྱའི་ཐུགས་སྲས་བླ་མཁྱེན་རྣམས་གཉིས་ཞེས་མགར་མི་འགྱུར་དང་རྣམ་རོལ་གཉིས་ལས་མགར་མི་འགྱུར་སྐུ་ཕྲེང་ལྔ་ཙམ་བྱུང་བ་ངག་རྒྱུན་དུ་བཤད་ཚུལ་ཡོད་ཀྱང་དོན་ལ་སྡོམ་པ་མི་འགྱུར་དང་གཉུ་བ་མི་འགྱུར། སྐོ་ནེ་མི་འགྱུར་གསུམ་ལས་མི་གསལ། ད་ལྟ་བཞུགས་པ་ནི་འགར་ར་མི་འགྱུར་ཞུ་ཞིང་ཁོང་ནི་ནང་ཆེན་མདོ་ཁམས་སྲིབ་མདའི་ཡབ་འགར་བ་ཀར་དགེ་དང་ཡུམ་བཀྲ་ཤིས་ཚེ་མཚོ་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ལྕགས་འབྲུག་ལོར་སྐུ་འཁྲུངས། ཆུང་དུས་ནས་དམ་པའི་རང་གཤིས་ལྡན་ཞིང་ཞི་དུལ་བག་ཡོད་ཀྱི་བསླབ་གསུམ་ངུར་སྨྲིག་འཛིན་པའི་ཁྱུ་མཆོག་སྙིགས་དུས་བསྟན་པའི་སྒྲོན་མེ་གཅིག་ཏུ་གྱུར་པ་ནི་རྣམ་ཐར་གྱི་ཆེ་བ་ཉིད་དུ་ཤེས་སོ།